Ligjvënësit në rajonin e pavarur serb të Bosnjës kërkuan nga qeveria rajonale të martën, të revokojë një raport të vitit 2004, i cili ka konkluduar se forcat serbe të Bosnjës vranë rreth 8,000 muslimanë në dhe përreth Srebrenicës, gjatë luftës së 1992-95 në vend.

Votimi u iniciua nga Presidenti nacionalist i Republikës Serbe, Milorad Dodik dhe disa analistë thonë se është çështja më e fundit e përdorur nga partitë qeverisëse serbe, për të mobilizuar votuesit rreth agjendës nacionaliste përpara zgjedhjeve në tetor.

Dodik, një avokat rajonit serb të shkëputur nga Bosnja, ka hedhur poshtë gjithmonë vendimet e dy gjykatave të krimeve të luftës, të Tribunalit Penal Ndërkombëtar për Ish-Jugosllavinë (ICTY) dhe Gjykatës Ndërkombëtare të Drejtësisë, se mizoria është cilësuar si gjenocid.

Megjithëse ka pranuar ekzistencën e një krimi, Dodik thotë se numri i të vrarëve ishte ekzagjeruar në raportin e vitit 2004.

“Raporti është i parëndësishëm, jashtëzakonisht selektiv, i pasaktë dhe tendencioz”, i tha Dodik parlamentit, duke thënë se duheshin përfshirë edhe viktimat serbe në Srebrenicë.

Parlamenti arriti në përfundimin se duhet të formohet një komision i ri ndërkombëtar, i pavarur, për të përcaktuar dëmet e pësuara nga të gjithë popujt në rajonin e Srebrenicës.

Boshnjakët e hodhën poshtë kërkesën. “Asnjë rishikim i këtij raporti nuk mund të ndryshojë provat e dëshmuara në gjykata, lidhur me këtë dhe rastet e tjera të krimeve të rënda të luftës”, tha Ramiz Salkiç, nënkryetari boshnjak i Republikës Serbe.

Ndërkohë, delegacioni i BE në Bosnje tha në një deklaratë: Bashkimi Evropian hedh poshtë çdo mohim, relativizim apo keqinterpretim të genocidit në Srebrenicë. Ne gjithashtu dënojmë përdorimin e retorikës dhe veprimeve nxitëse etno-politike.

Një deklaratë e përbashkët nga tre trupa të tjerë duke përfshirë Ambasadën e SHBA në Bosnje, ishte gjithashtu kritike, duke thënë se ata “dënojnë fuqishëm shfrytëzimin cinik të raportit të Komisionit të Srebrenicës të vitit 2004, për qëllime politike në prag të zgjedhjeve”.